Blog Khusus Untuk Masyarakat Kab.Madina

Maju bersama untuk Kab.Madina

MARKOBARI SANTAK TU POTANG NIARI

Posted by kabmadina on October 11, 2008

Inda dabo harani somak ni akali, Atope bonci ni ate-ate niba i. Tu koum na “mamuja-muja” ompu najumolo sunduti. Artina nada giot manungkiskon asaya na adong dikuali mi. Na di dalian na tolu I patama dokononi.Tai sabotulna, ambaen na ibo do di bagasan roai, margasa ate-ate niba i pasari-sari hangoluan di bona-bulunta i. Marjale-jelu dabo sude tarida di matai. Ampot le amban naso adong be “sulu-sulu di nagolap” bope “tungkot-tungkot  dinalandit dikoum-koum tai ? . On ma, sannari natarjadi jamuda pe na ombar banjar do mora-anakboru dohot kahanggi-lahanggi i. Madung masuk tarauma do luai  dalian i..! Tai halai na dikota-kota les manganggap warisan namulia tingon ompu-ompui natama dimaso sannari. Lagak mada parroa na marbaju adati, tai inda taraso madung masuaki do tarida aurati.

Nasaulak di hari nasolpui, kehe mada au manotpotkan lomo ni roa hatiha siriaon  ni suhuti. Giot pabuat si Taing ninna tu dalan matobangi. Si nuan boyu jagar-jagar ni halai namarkahanggi i.

Ombang ma antong amak lampisan namarmocom-mocom derajatnai. Adong musema napuran nadung dipasigop lengkap dohot burangir sontang  soda nai dohot naasing-asingnai. Anso jeges tarid galanggan panulakan ni sere tingon bayo pangoli i.

Juguk mantong di si barisan ni kahanggina, anak boruna bope mora-mora nasogok-gokkan matanai. Bo adong muse do rupana namarjabatan Raja, Raja Panusunan Bulungi na dibanama namasak namatana diparadatann imuse namangelen borkah satiop pajojor-jojor napuran I tu sada-sada halak i. Dipantar bolaki rami ma antong halak koum-koum natingon tiop barisannai.

Adopeh hita muloi ma ning kahanggi ni suhuti, dipajojor ibana hata-hata hormat-hormat tusude koum-koum, bope ibana tingon barisan ni  kahanggi, songoni muse tingon barisan ni anak boru, tarlobi-lobi tuadopan ni barisan no morai sumurungn lobi tu adopan ni raja panusunan bulungi. Sudee tardok muse anak niraja dohot anak ni namora…horass hita sude ningna ma nadeges baso-basonai.

Sidung ibana markobar muse ma nadisamping tarsarupo hata-hata nai. Sattai sapulu noli sattabi sapulu noli marsattabi, Artina artina, patama dokonon patama dokonon, amben nadison dope nadison dope halai ma napatama obarnai. Sidung ibana,, Sattabi sattabi sapulu artina artina, tama dokonon tama dokonon, amben nadison dope halai,  halai ma manambaina. Sidung ibana : ro muse santabi-santabi sapulu artina artina, tama dokonon na tama dokonon, ambaen nadison dope antong halai..halaima nahum malo patama hobarnai…Santak tu barisan ni anak boru-anak borunai, mangecek sude di halak namarlaguti.

Adopeh..pajojor hamuma burangiri tusude koum-koum taon ningkalai ma tu sada anakboru i. Dipajolo mantong tu adopan ni Raja Panusunan na tarhormati..dijamah ibana antong baru tola ma digilirkon satiap-tiap barisannai. Anggi anak boru namanyurduon napuran nai..mondok-mondok bungkuk doma manghadop-adop tusatiop halak na adong di pantar bolak i.

Bo rupana namamuloi pangkal ni ruas napasadana dope sude horbar-hobar i.

Masuk tu ruas napaduana, songoni museee, kobar-kobar nadibumbui dohot tamsil namarpantun-pantunnai. Manombo antong tagi binege..manombo inda mangari iba maksud nidardokon ni halai i. Santabi-santabi Artina artina,, tama dokonon tama dokonon, tarsongon tarsongoni ambaen na dison dope halai..

Sidung ruas napadua na, songoni muse nangkan na tu ruas napatoluna i..

Imada…ningbayo tibo-tibo pabege-bege hata natagii..Oloda..ning hala nadi toru jandelai muse di ujung ni hobar ni sada bayoi.

Ke muse ma tu ruas napatoluna…anak boru manggilirkon napuran muse tu adopan ni jolma-jolma na muloi marlojaan i. Adong rupana sada bayo ampot inda tartahan ibana tu ngaol-ngaol ni pat nangkon lompit i. Ipalidang ibana antong pania duauda na manghadop tu tonga ni halak namuliai..Ambaen patuhna anakboru si “tamba naurang si orus nalobi”i..bo..tardege ibana mada pat ni halak nadong nyae ni pat nai..Alaah ninna doma manaongkon dege-dege bayo anakborui..Tarsonggot muse mada anakborui..targompang muse ibana ni pamatai hala nabahati.Marsarsaran napuran i. Anggo suhut I marrarai doma muko niai, Tai anggo rajai da dohot hulubalangnai mikim-mikim di bibirnai…

Jadima, insiden sajo daoi..palalau ma tu ruas-ruas nasatorusna.

Moni bane namaila anak boru kehe antong ibana tubalakang igontian anakboru nasada muse ma. Masuk ma tu tamba ni ruasnai..markobar-kobar muse ma nangkan tangionkon. Ditonga-tonga nai,, mulbas muse mada hodok ni sada bayo…disampingki. Gumotar-motar pamatang ni ibana i. Namangua muse do le amantuao ningroangku manjalai nai. Kasidunganna gulung boto ibana iangkat kalai doma tu pantar sabolah.mangkipas-kipasna halak na darah tinggi i.

Inda ba mantak acara manulak serei..Patorus ma songoni…ninna be. Aupe muloi ma sabotulna loja..stresss, nahohok madongan kobar-kobar ni koum tai ningku tu sada kahanggii na dohot juo di majlis i. Bo ia pe rupana madung songon namanyamping muse do rupana tarida parjuguk niai. “Mungkap ambeyenku kahanggi” ningia tusupingku markusip.

Tai nian satongkin nai domon ningroangku…ningku muse tusia manyobarii. Tarbancut do tarida mukoniai, ta bia ma angkon na tapalaui sampae tu ujung carito ni adat manulak sere ni koumi.

Sabotulna aupe madung male do hulala mangiuti adat artina-artina on, pukul pe madung angko dua, male doba boltoki. Muloi ma markuraok …mandok obar male bituangki. Tai indape nasidung halai namarkobarii. Kasidunganna baen nabusa base ma ilalai, pat mangaoli, boltok masuk angina..giot manggonti posisi juguk inda sodar ate-atei adong muse boto namangkuling tingon toru ni jugukki, santabi : “shiiit??!…” ninna.. Ma mate ita ning ilangki..ila nagodangiii..Ampot baya inda ikhlas iba namangikuti adat ni koum-koum i..? Bahat upat niba tu halak namarkobari i ? Syukurma baen nabarisan sada dua halak kahanggi maia namambegesa. Baen ilana dibagasan roai, udokon doma nagiot kehe jolo satongkin tu masojid giot sumbayang luhur, ma pukul tonga tolu bo ningku tu sabolahki.

Santabi-santabi, artina-artina, tama dokonon-tama dokonon, ambaen nadison dope halai amben nadison dope halai…tambai homu ma…
***
On da sude harani : “holong dohot domu” do da. Santabi…

Jampurut

Pantar Bolak.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: